تغطية خاصة

احمد:السلام عليكم ورحمة الله مستمعينا في كل مكان

قبل منبدأ مها --حاضر يامها ثواني متشديش المايك حقول --مها كانت عايزة تقول حاجة مهمة
مها:احم احم
احمد ..ربنا يستر
مها:أعزائي المستمعين ...لعلها تكون الصدمة ...نعم ..انعي لكم بقلب يملئه اسي و اسف يملأ اركان الاستوديو اني مش هقدر اذيع انهارده الحلقة مع احمد

احمد : ايه يا مها حصل ايه ؟
مها: لحظة يا احمد ..يا جمهوري ..للاسف
احمد: يا بنتي في ايه قلقتيني
مها ...استني بقي ده انت السبب اصلا
احمد: انا ؟؟؟
مها:فيه عندنا في الأذاعة ازمة مكروفونية سببها الاستاذ احمد
احمد: باشمهندس سمحتي
مها :ماشي ..الاستاذ احمد بقي هو اللي
.احمد: ....
مها : استولي علي المايك بتاعي و مش راضي يجيبلي واحد و عامل دشمة في االاستديو عشان ماخدش المايك منه
احمد: امال انتي بتتكلمي ازاي و صوتك واصل للجمهور
مها :ما انا عمالة ازعق اهو عشان الصوت يوصل للمايك عندك ..مع انه اصلا بتاعي
احمد: لا هو اصلا بتاعنا احنا الاتنين
مها :امال واخده انت ليه ؟
احمد: ...عشان...ايه..كدة
مها :كده!!!!!!!!
ماشي ...انا هتصرف
احمد:رايحة فين

.........
احمد
في حلقة خاصة من برامجنا اليوم نقدم اليكم مستمعينا وقرائنا الاعزاء في كل مكان

تغطية لحفلة صوت المدونين علي الالفي صاحب مدونة تفاصيل وفريق ستب باي ستب

التي اقيمت يوم الخميس الخامس من يوليو في ساقية الصاوي بالزمالك

مها : ..احمد؟؟؟
احمد: في ايه تاني يا مها ؟؟؟
مها : فين الكنكة ؟؟
احمد: كنكة ؟؟؟كنكة ايه ؟؟؟احنا في استديو هنا مش مطبخ ؟
مها : ما انا عارفة ...بس فين الكنكة
احمد: هناك ليه ؟هتعمليلي قهوة ؟؟؟
مها : و مين قال اني بعرف اعمل قهوة ؟
احمد : !!!!!
مها : مش انت قلت اتصرف ؟؟؟ماشي
اتصرفت
احمد: هتتكلمي من الكنكة ؟
مها ..ايون
احمد: بقي ده كلام يا مها

خلاص يا ستي عشان نحل الازمة احنا حنتكلم سوا المرة دي لحد منحل المشكلة ونجيب مايك تانيبس عامة الكنكة في البوفيه ممكن قهوة مظبوط في كباية بعد اذنك عشان نكمل الحلقة؟؟؟؟؟؟؟

فاصل ونعود

اقرا في مدونة قصاقيص مشاعر...مش نسياك

مها:اهلا بكم

5-7-2007
يوم بجد جميل جدا بكل تفاصيله
اليوم ده كان لقاء المدونين ..اول لقاء احضره
في ساقية الصاوي في القاهرة
اتجمع فيه ناس كتير اوي
بيحبوا بعض اوي
فرحانين اوي انهم جايين يشاركوا واحد مدون صاحبهم فنان اوي
عشان يقفوا جنبه في حفلته و يشاركوه نجاحه
الفنان هو علي الالفي
و الاصحاب الحلوين اوي كانوا
انجي سمراء النيل
وخطيبها طارق واحد من الناس
عمرو احمد اريدك انثي
حازم بين الامل و الياس
نهي كراكيب
طارق روكا

مروة وينكي

اشرف توفيق اخف دم

مصطفي حسان هرتلة

مني احاول اكون

رضوة ساعة الغروب

شيماء الصراحة خنقة

احمد زورديك

وساهر الكيبوردست العبقري في فرقة ستب باي ستب وصاحب مدونة حنين

و...احمد عيسي لحظات
و انا مها غربة وطن

أحمد:اول حاجة حصلتلي وانا جاي الحفلة اني اتاخرت وركبت اتوبيس بعد المعاد اللي كنت مقرره بساعة

ولما وصلت ركبت تاكسي والسواق مكنش يعرف فين الساقية

وضربت لخمة لاني كنت نسيت الوصف اللي علي قالهولي

بس انقذتني رضوة لما اتصلت بيا عشان تشوفني اتأخرت ليه

ووصلت متأخر

وانقذتني رضوة تاني هي ومروة لما كنت واقف علي الباب ضارب لخمة مش عارف اجيب حد

نسيت اقول ان مكنش معايا رصيد يومها

وكلمتني مها اول موصلت عشان برضه تطمن انا وصلت

واضح اني كنت عامل لكل اللي كنت قايلهم اني جاي قلق كبير

علي بقي اول مخرج قبل الحفلة مباشرة كان سعيد جدا اننا كلنا جينا و عوضناه عن العدد اللي كان متوقعه من مدوني بور سعيد اللي للاسف كتير منهم مقدروش يجوا
واخدني في حضنه وقالي

ربنا يخليك ليا

محدش في الدنيا يقدر يوصف انا كنت سعيد اد ايه لما شفت سعادته دي واني كنت السبب فيها

وكمان كنت مبسوط قوي قوي اني شفت المشاغبة مها

ايون يامها انتي مشاغبة

وينكي بقي اعصار من الضحك والمرح والانطلاق

الانطباع العام لينا كلنا انها مكنتش اول مرة نشوف بعض

او بالنسبة لي لاني كنت اول مرة اشوف كل الناس اللي شفتها بس اخدت عليهم كاني اعرفهم من سنين

مها:بس حاجة لاحظتها خالتني اشك في نفسي اني مرحتش الحفلة دي الا و هي ان محدش كان عارفني و محدش قال اني كنت موجودة

احمد :يمكن لانك مكنتيش تعرفي ناس كتير هناك

مها :كمان مكنتش واخده علي جو الحفلة ده غير اني مكنتش اعرف كل المدونين بس 3 من اكتر من 20 مدون كنت اعرفهم و بدخل مدوناتهم

علي فكرة ... كتير من المدونين لسه منزللوش بوست عن الحفلة و كمان الصور لسه منزلتش عند اي حد وكلام في سركم ان ده سبب تأخير تغطية دوت سبوت للحفلة اننا كنا مستنيين الصور

تقريرمسجل اعدته الزميلة وينكي من اذاعة المدونين

Blogger radio Station

لقاءبلوجري اجمل حلم يتحقق

مها:اكتر اغنية عجبتني...ممممممممممم
بصراحة كتير
شوكلاته جميلة اوي

بس الاحلي بجد كانت وسط البلد
اول ما روحت رحت منزلاها من النت و حبيت انكوا تسمعوها معايا


وسط البلد
وسط البلد و كوبري قصر النيل
بنت وولد و قصيده علي المنديل
اجمل عيون في لكون و حبنا المجنون
و ريحة الينسون
و سحر الجنزبيل
في وسط البلد
...
فاكرة البكا علي اي طير مدبوح
و الصعلكة بالليل في شارل ديجول
ريحة الغورية تطير
من العتبة للتحرير
و في قلعة الاساطير
الشاي و صحن الفول
في وسط البلد
..
زي القمر
يا ماشية علي الكورنيش
نزل المطر بوظلك الكرانيش
مصر القديمة هناك
طاله من الشباك
و حسنها الفتان ...الورد بشويش

مراسلتنا نهي من مدونة كراكيب والتي كتبت عن الحفل

احلامنا

لو تعرف تستطعم وتهزر وتحب وتحلم

ركز أوي في عنيا

هتلاقي بنت عادية من بدري مستنية

تضحك عليها بشيكولاته

محتاجة اوي للشيكولاته

وأبقى في دمك شيكولاته

عيوني ماكينة خياطة

شغلت بقربك شال

كلمني عن شلال في بحر شيكولاته

نفسي جنب الاقي

بوسة بطعم الشيكولاته

اصل الحكاية ببساطة

كل البنات بتحب الشيكولاته

أغنية لفرقة ستيب باي ستيب – كلمات أحمد حداد
وعدت الصديق الموهوب علي الألفي لما نزل يسلم علينا في استراحة الحفله
اني هكتب بوست لما ارجع البيت قلت له تعرف اسمه ايه؟؟اسمه أحلامنا أحلامنا يا علي أحلام البلد دي شبابها الجميل اللي كان متجمع حوالين بعضه امبارح بيغني ويضحك ويكتب ويرسم ويحلم الحلم اللي لسه ضمين عليه ايدينا ومش هنسيبه

أنا فرحانه أوي بالحفلة بكل اللي غنوا امبارح
بالفرقة كلها بالملحن التحفه أحمد عاصم والشاعر بهاء عبد الرحمن.. غير اغاني احمد حدادانا حبيت كل اغاني الحفلة
ورغم اني كنت مرهقه اوي وهموت من التعب
لكن صقفت وغنيت ودخلت في مود حلو اوي اوي

فيه كمان اغنية

لكن جميلة اوي
كنت حاسة اني هعيط فيها
لكن حاجة كانت بتشدني اني مبكيش
مكنتش عايزة اي حاجة تزعلني

أحمد:انا عجبني قوي اغنية اسمها هو انت جيت

بس منكرش ان الاغاني كلها كانت حلوة

والجيتار فيها كان اكتر من هايل..انا اساسا عاشق للجيتار

زي مابن الالفي قالي موسيقي راقية جدا واداء جميل

مراسلتنا مني من مدونة بحاول اكون كتبت

يوم جامد جدا

احمد:الانطباع اللي مقدرتش انساه فعلا عن سمراء النيل...انجي

كاريزما قوية جدا وحضور من النوع التقيل قوي..

ودم زي العسل

وعن غربة وطن..مها

طبعا قاعدة جنبي ورافعة عليا الماكيروفون الوحيد اللي حيلتنا

بس بجد دمها خفيف جدا جدا واشقي مما كنت متخيل

وكانت نهاية اليوم مع المدون والراجل الجدع جدا اشرف توفيق

كان الوقت اتاخر وقررت اني ابيت في القاهره

وعرضت علي اشرف مابين متردد ومتردد انه يستضيفني الليلة عنده

وبالرغم من اننا كلنا كنا مرهقين جدا ومش شايفين خصوصا بعد المشوار الجميل اللي اخدناه مشي من الساقية لبيت اشرف

الا ان الليلة كانت اجمل من انها تتنسي

مصطفي حسان ومحمد البدري واشرف توفيق والعبد لله

مش عارف اقول ايه اكتر من شكرا علي الاستضافة دي يارجاله

وبجد انا سعيد جداجدا بكل اللي اتشرفت بمعرفتهم اليوم الجامد ده

نختتم قائمة مراسلينا بحازم من مدونة انسان بين والياس حكي فيه عن مواقف قبل الحفلة مع جروب كبير من المدونين

من احلي ايامي

مها:المشكلة الوحيدة اللي حصلت هي تاخير بداية الحفلة اللي بدات بعد 9 مع انها المفروض تبدا 8 و نصف عشان كده اتاخر معاد نهايتها و للاسف ده خلي ناس كتير تمشي قبل ما نتصور كلنا سوا بس محدش كان زعلان كلنا كنا فرحانين اوي الحمد لله عقبال اللقاء التاني

كان معكم مها &احمد عيسي

في تغطية خاصة لحفل صوت المدونين علي الالفي

وفريقStep by Step